August 20, 2017

રાહુના કર્ક અને કેતુના મકર રાશિ ભ્રમણનું બાર રાશિઓ પરત્વે ફળ

ભારતીય જ્યોતિષ અનુસાર રાહુ અને કેતુ સૂર્ય અને ચંદ્રના ભ્રમણમાર્ગ પર રહેલાં છેદનબિંદુઓ છે. સૂર્ય અને ચંદ્રના બ્રહ્માંડમાં પોત-પોતાનાં માર્ગ પર ભ્રમણને લીધે રાહુ અને કેતુની સ્થિતિ પણ બદલતી રહે છે. રાહુથી કેતુ હંમેશા 180 અંશની દૂરી પર રહે છે. 18 ઓગસ્ટ, 2017ના રોજ વહેલી સવારે 04.28 કલાકે રાહુએ કર્ક રાશિમાં અને કેતુએ મકર રાશિમાં પ્રવેશ કર્યો છે. અહીં તેઓ 7 માર્ચ, 2019 સુધી ગોચર ભ્રમણ કરશે. રાહુ-કેતુ એક રાશિમાં આશરે 18 મહિના સુધી રહે છે. રાહુ-કેતુના આ કર્ક-મકર રાશિ ભ્રમણનો બાર રાશિઓ/જન્મલગ્ન કેવો પ્રભાવ પડશે તે જોઈએ.

અહીં નોંધ લેશો કે નીચે વર્ણવેલ ફળ સ્થૂળ છે. સૂક્ષ્મ ફળનો આધાર વ્યક્તિગત કુંડળીમાં રહેલાં ગ્રહો, દશા-મહાદશા, અષ્ટકવર્ગના બિંદુ વગેરે પરિબળો પર રહેલો છે.

મેષ: રાહુએ ચતુર્થભાવમાં અને કેતુએ દસમભાવમાં પ્રવેશ કર્યો છે. માનસિક અશાંતિ અને પીડાનો અનુભવ થઈ શકે છે. માતાને શારીરિક કષ્ટનો અનુભવ થાય. જો કે માતા તરફથી લાભ થઈ શકે છે. કોર્ટ-કચેરીના કેસ ન થાય તેની કાળજી રાખવી. આપત્તિચિંતા અને અસ્થિરતાને લીધે હેરાનગતિ અનુભવાય. ગૃહ ક્લેશ થવાની સંભાવના રહે. નોકરી અને વ્યવસાય ક્ષેત્રે વિઘ્ન આવી શકે છે. આ સમય દરમિયાન નવા સાહસોની શરૂઆત ન કરવી જોઈએ. કાર્યના ભારણને લીધે કઠોર પરિશ્રમ કરવો પડી શકે છે. સરકારી કામકાજોમાં અવરોધનો અનુભવ થાય. નવી સ્થાવર સંપતિ કે વાહનની ખરીદી થઈ શકે છે. આમ છતાં સ્થાવર સંપતિને લીધે હાનિ ન થાય તેની કાળજી રાખવી. ઘર અને કામના સ્થળમાં ફેરફાર થઈ શકે છે. 

વૃષભ: રાહુએ તૃતીયભાવમાં અને કેતુએ નવમભાવમાં પ્રવેશ કર્યો છે. ચિત્તનું સમાધાન થાય. વિઘ્નો દૂર થઈને કાર્યો પૂર્ણ થવાની શરૂઆત થાય. આત્મવિશ્વાસ, પરાક્રમ અને સાહસની વૃદ્ધિ થાય. ઈચ્છાઓની પૂર્તિ શક્ય બને. પ્રકાશન, લખાણો, સંદેશાવ્યવહારની પ્રવૃતિથી લાભ થઈ શકે છે. સમાજ તેમજ વ્યવસાયમાં માન્યતા અને સન્માનની પ્રાપ્તિ થઈ શકે છે. યોગ્યતા અને કુશળતામાં વધારો થાય. વ્યવસાયને લીધે કે અન્ય કારણોસર ટૂંકી યાત્રાઓ થઈ શકે છે. ધાર્મિક સ્થળોની યાત્રા થાય. ધાર્મિક વલણમાં વધારો થાય. પિતાનું આરોગ્ય કાળજી માંગી લે. ભાઈ-બહેનો દ્વારા લાભ થાય. પરંતુ ભાઈ-બહેનોને શારીરિક કષ્ટ કે પીડા પહોંચી શકે છે. ભાઈ-બહેનો સાથેના સંબંધમાં બદલાવનો અનુભવ થાય. મિત્રો અને પડોશીઓ મદદરૂપ બને. વિદેશયાત્રા શક્ય બને.     

મિથુન: રાહુએ દ્વિતીયભાવમાં અને કેતુએ અષ્ટમભાવમાં પ્રવેશ કર્યો છે. ધનલાભ થવાની શક્યતા રહે. આમ છતાં ધનને લીધે માનસિક ચિંતા રહ્યા કરે. સ્થાવર સંપતિ જો ગીરવે રાખી હોય તો મુક્ત કરાવી શકાય. કુટુંબના સભ્યોનું આરોગ્ય ચિંતા કરાવી શકે છે.  કૌટુંબિક જીવનમાં હેરાનગતિનો અનુભવ થાય. ગેરસમજને લીધે કુટુંબના સભ્યો વચ્ચે મતભેદ ઉભા થવાની સંભાવના રહે. જીવનસાથીના કુટુંબના સભ્યોનું આરોગ્ય પણ ચિંતા કરાવે. જીવનસાથીનું પોતાનું આરોગ્ય પણ ચિંતા કરાવી શકે છે. અદાલતી મામલાઓમાં નુક્સાન પહોંચવાની સંભાવના રહે. પૂરાવાઓ મળવામાં વિલંબ થાય. ગૂઢ અને આધ્યાત્મિક બાબતો પ્રત્યેની રુચિમાં વધારો થાય. વાણી પર સંયમ રાખવો જરૂરી બને. દાંત-આંખોની સંભાળ લેવી. અજાણ્યા ખાદ્યપદાર્થો અને અયોગ્ય આહાર ગ્રહણની આદતોથી બચવું. ઈજા અને અકસ્માતો ન થાય તેની કાળજી રાખવી.

કર્ક: રાહુએ પ્રથમસ્થાનમાં અને કેતુએ સપ્તમસ્થાનમાં પ્રવેશ કર્યો છે. માનસિક ચિંતા અને શારીરિક પીડાનો અનુભવ થઈ શકે છે. ભય અને ભ્રમણાઓ પેદા થાય. જીવનમાં નિર્ણયો લેવામાં મૂશ્કેલીનો અનુભવ થાય. કોઈ અજાણ્યો ડર સતાવે તેવું બને. લોકો ભૂલ બતાવે તો પણ સ્વીકારી ન શકો. સ્વભાવ અને વ્યવહારમાં ચિડીયાપણું આવે. સ્મરણશક્તિ મંદ પડે. શારીરિક નબળાઈનો અનુભવ થઈ શકે છે. દાંમ્પત્યજીવનમાં મૂશ્કેલીઓનો સામનો કરવો પડી શકે છે. જીવનસાથીનું આરોગ્ય ચિંતા કરાવે. જીવનસાથીની અપેક્ષાઓ પ્રત્યે અલિપ્ત રહો તેવું બની શકે છે. વિશિષ્ટ વ્યક્તિત્વ અને ઓળખ પ્રાપ્ત કરવાની ભૂખ જાગે. સામાજીક ઓળખમાં બદલાવ આવી શકે છે. ભૌતિકવાદી વલણ રહે. વ્યવસાયમાં ભાગીદારો સાથે મતભેદ પેદા ન થાય તેની કાળજી રાખવી.

સિંહ: રાહુએ દ્વાદશભાવમાં અને કેતુએ ષષ્ઠમભાવમાં પ્રવેશ કર્યો છે. ઘણાં પ્રવાસો થવાની શક્યતા રહે. વિદેશયાત્રા શક્ય બને. વિદેશી સંબંધોને લીધે લાભ થાય. નાણાકીય ખર્ચાઓમાં વધારો થાય. ઋણ ચૂકવી શકાય પરંતુ લેણાં નીકળતાં પૈસા પરત ન મળે તેવું બને. નાની-મોટી વસ્તુઓની ચોરી ન થાય તે બાબતે સાવધાન રહેવું. હિતશત્રુઓની વૃદ્ધિ થઈ શકે છે. વિરોધીઓ તમારી છબિને નુક્સાન પહોંચાડી શકે છે. આમ છતાં ગુપ્ત શત્રુઓને આ સમય દરમિયાન ઓળખી શકો તેવું બને. કાનૂની કાર્યવાહી અને અન્ય સમસ્યાઓનો સામનો કરવો પડી શકે છે. અનિદ્રાનો રોગ લાગુ પડી શકે છે. આંખોની કાળજી રાખવી. સપનાઓ અને કલ્પનાઓની દુનિયામાં જીવો તેવું બને. રહેઠાણના સ્થળમાં બદલાવ આવી શકે છે. જીવનસાથીના આરોગ્યની કાળજી લેવી. આધ્યાત્મિક માર્ગદર્શનની પ્રાપ્તિ થઈ શકે છે.

કન્યા: રાહુએ એકાદશભાવમાં અને કેતુએ પંચમભાવમાં પ્રવેશ કર્યો છે. વ્યવસાયથી લાભ થવાની શક્યતા રહે. ઉત્તમ નાણાકીય લાભ થઈ શકે છે. અનપેક્ષિત મદદ મળી રહે. કાર્યો પૂર્ણ થઈને કીર્તિની પ્રાપ્તિ થાય. ચૂંટણીમાં વિજયની પ્રાપ્તિ થઈ શકે છે. નોકરીમાં પ્રમોશન મળવાની સંભાવના રહે. સામાજીક પ્રવૃતિઓ અને સંગઠનોમાં આગળ પડતો ભાગ લઈ શકાય. નવી મિત્રતા અને નવા સંપર્કો બનાવી શકાય. લાંબા સમયથી રહેલી ઈચ્છાઓની પૂર્તિ થાય. મોટા ભાઈ-બહેનોને શારીરિક કષ્ટ અને પીડાનો અનુભવ થઈ શકે છે. સગર્ભા સ્ત્રીઓએ વિશેષ કાળજી લેવી. સંતાન બાબતે સમય નકારાત્મક રહે. શેર-સટ્ટા માટે સમય પ્રતિકૂળ રહે. પ્રણયસંબંધમાં મૂશ્કેલીનો અનુભવ થાય. વિદ્યાર્થીઓએ અભ્યાસમાં વધુ મહેનત કરવી પડે. ધાર્મિક તથા આધ્યાત્મિક બાબતો અંગેનાં અભ્યાસમાં આગળ વધી શકાય.

તુલા: રાહુએ દસમભાવમાં અને કેતુએ ચતુર્થભાવમાં પ્રવેશ કર્યો છે. ઉદ્યોગમાં સફળતાની પ્રાપ્તિ થાય. લાભમાં વૃદ્ધિ થઈ શકે છે. નોકરીમાં પ્રગતિ થાય. અકસ્માતે કે અચાનક જ પ્રમોશન મળી જાય તેવું બને. સામાજીક કે કાર્યક્ષેત્રે સત્તાની પ્રાપ્તિ થાય. નેતાગીરી લઈ શકાય. સામાજીક માન-પ્રતિષ્ઠામાં વૃદ્ધિ થાય. ઉપરી અધિકારીઓના સહકારની પ્રાપ્તિ થાય. માનસિક ચિંતા કે અશાંતિનો અનુભવ થઈ શકે છે. માતાના આરોગ્યની કાળજી લેવી. સ્થાવર સંપતિ અને વાહનના પ્રશ્નો ચિંતા કરાવી શકે છે. સ્થાવર સંપતિ કે વાહનને લીધે નુક્સાની સહન કરવી પડી શકે છે. ગૃહજીવનમાં ક્લેશનો અનુભવ થાય. કામકાજની વ્યસ્તતાને લીધે ઘર-પરિવારને પૂરતો સમય ન આપી શકાય. ઘરની અને સંતાનોની જવાબદારી પ્રત્યે બેદરકાર બનો તેવું બને. રહેઠાણના સ્થળમાં બદલાવ આવી શકે છે. વિદ્યાર્થીઓએ અભ્યાસમાં મહેનત કરવી જરૂરી બને.

વૃશ્ચિક: રાહુએ નવમભાવમાં અને કેતુએ તૃતીયભાવમાં પ્રવેશ કર્યો છે. ઉચ્ચ અભ્યાસ અર્થે વિદેશગમન થઈ શકે છે. ઉચ્ચ અભ્યાસ સારો થાય પરંતુ તેનો પ્રભાવ પડતો ન જણાય. વ્યવસાય અથવા નોકરીમાં પ્રગતિ થઈ શકે છે. સરકાર દ્વારા સન્માનની પ્રાપ્તિ થાય. ઘણાં પ્રવાસો-યાત્રાઓ થવાની સંભાવના રહે. ધર્મ અને પરંપરાને લગતાં વિચારોમાં બદલાવ આવી શકે છે. ધર્મ વિમુખ કે નાસ્તિક બની જવાની શક્યતા રહે અથવા અન્ય ધર્મ પ્રત્યે આકર્ષણ અનુભવાય. પિતાના સ્વાસ્થ્યની કાળજી લેવી. પિતા સાથે ગેરસમજ થવાની સંભાવના રહે. માતા માટે પણ આ સમય શારીરિક રીતે કષ્ટપ્રદ રહેવાની સંભાવના છે. પરાક્રમ ક્ષમતા બાધિત થઈ શકે છે. ભાઈ-બહેનોની અપેક્ષાઓ પ્રત્યે અલિપ્તતા દાખવો તેવું બની શકે. ભાઈ-બહેનોના વિવાહનો પ્રસંગ ઘટિત થઈ શકે છે. પ્રારંભિક અવરોધ બાદ ભાગ્યની વૃદ્ધિ થાય.

ધનુ: રાહુએ અષ્ટમભાવમાં અને કેતુએ દ્વિતીયભાવમાં પ્રવેશ કર્યો છે. વ્યક્તિગત જન્મકુંડળીમાં જો આકસ્મિક લાભના યોગ હોય તો આ સમય દરમિયાન રેસ, શેર-સટ્ટા, લોટરી દ્વારા અથવા વારસાકીય ધનલાભ થઈ શકે છે. જીવનસાથી અથવા શ્વસુરપક્ષથી ધનલાભ થઈ શકે છે. વ્યર્થ યાત્રાઓ થઈ શકે છે. સંચિત ધનનો વ્યય થવાની સંભાવના છે. વાણીની કટુતાને લીધે સંબંધોમાં તિરાડ પડી શકે છે. કુટુંબના સભ્યો સાથે મતભેદ થાય અથવા કુટુંબના સભ્યોનો વિરહ સહન કરવો પડે. ગૂઢ બાબતો પ્રત્યેની રુચિમાં વધારો થાય. સંશોધન ક્ષેત્ર સાથે જોડાયેલાં જાતકો માટે આ સમય પ્રગતિજનક રહે. રહસ્યપૂર્ણ બાબતો અંગે રસ જાગે. આ સમય દરમિયાન આરોગ્યની કાળજી લેવી અને બિમારીઓ પ્રત્યે બેદરકાર ન રહેવું. લગ્નજીવનમાં કષ્ટ આવવાની સંભાવના રહે. આંખોની કાળજી લેવી. આર્થિક અડચણો, શારીરિક કષ્ટ અને માનસિક અશાંતિનો અનુભવ થઈ શકે છે.

મકર: રાહુએ સપ્તમભાવમાં અને કેતુએ પ્રથમભાવમાં પ્રવેશ કર્યો છે. વ્યવસાયમાં આકસ્મિક વૃદ્ધિ થઈ શકે છે. લોકોની મદદ મળી રહે. અપરિણીત જાતકોના લગ્ન થવાની સંભાવના રહે. પરિણીત જાતકો માટે આ ભ્રમણ જીવનસાથી સાથે મતભેદો પેદા કરાવી શકે છે. જીવનસાથીનું આરોગ્ય ચિંતા કરાવી શકે. વિજાતીય પાત્રોથી સંભાળીને રહેવું. વિજાતીય પાત્રને લીધે બદનામી થવાની સંભાવના રહે. વ્યવસાયમાં ભાગીદારો સાથેના સંબંધમાં તણાવનો અનુભવ થઈ શકે છે. ત્વરિત નિર્ણયો લેવામાં મૂશ્કેલીનો અનુભવ થાય. વાદવિવાદ અને દલીલો કરવાથી દૂર રહેવું. અદાલતી કાર્યોમાં અડચણનો અનુભવ થઈ શકે છે. શારીરિક પીડાઓ અને કષ્ટ આવી શકે છે. આધ્યાત્મિક વલણમાં વધારો થાય. નાણાની આવક અંગે ચિંતાજનક સમય રહે. અલિપ્તતા અને અતડાંપણાની લાગણી તીવ્ર બને. ઉત્સાહની કમી રહે.

કુંભ: રાહુએ ષષ્ઠમભાવમાં અને કેતુએ દ્વાદશભાવમાં પ્રવેશ કર્યો છે. અદાલતી મામલાઓમાં યશની પ્રાપ્તિ થઈ શકે છે. શત્રુઓ પર વિજય મેળવી શકાય. વિવાદોને કોરાણે મૂકીને જીવનમાં આગળ વધો. ચિંતાઓ દૂર થઈને વ્યાપારમાં વૃદ્ધિ થઈ શકે છે. ઋણ ચૂકવી શકાય. સુખ અને સમૃદ્ધિમાં વધારો થાય. જીવનમાં આવનારી સમસ્યાઓ અને પડકારો સામે લડવા આત્મબળ કેળવી શકો. નોકરી-વ્યવસાય માટે સમય અનુકૂળ રહે. નવા સાહસની શરૂઆત કરી શકાય. વધુ પડતો શ્રમ આરોગ્યને હાનિ પહોંચાડી શકે છે. નોકરીમાં અણધાર્યો કે અચાનક બદલાવ આવી શકે છે. આધ્યાત્મિક પ્રગતિનો અનુભવ થાય. દાંમ્પત્યજીવનની સમસ્યાઓના ઉકેલની પ્રાપ્તિ થાય. રમત-ગમતના ક્ષેત્રમાં સફળતા મળી શકે છે. પરદેશ સાથેના સંબંધને લીધે લાભ થાય. જૂના મિત્રો લાભદાયી નીવડે.

મીન: રાહુએ પંચમભાવમાં અને કેતુએ એકાદશભાવમાં પ્રવેશ કર્યો છે. સંતાન પ્રાપ્તિ થઈ શકે છે. અભ્યાસ પૂર્ણ થઈને ડિગ્રીની પ્રાપ્તિ થાય. આમ છતાં વિદ્યા અને સંતાનને લગતી બાબતો માટે સમય ચિંતાજનક કહી શકાય. અભ્યાસ વધુ મહેનત માગી લે. અભ્યાસમાં એકાગ્રતાનો અભાવ રહે. સગર્ભા સ્ત્રીઓએ વિશેષ કાળજી લેવી. શેર‌-સટ્ટાથી લાભ રહે. પ્રણયસંબંધમાં સફળતા મળી શકે છે. પ્રેમલગ્ન થવાની શક્યતા ઉભી થાય. કળા અને સર્જનાત્મક બાબતો સાથે જોડાયેલાં જાતકો માટે આ સમય લાભપ્રદ રહે. સર્જનાત્મક વિચારોમાં વૃદ્ધિ થાય. મનોરંજન પ્રત્યેના આકર્ષણમાં વધારો થાય. બૌદ્ધિક કાર્યો સાથે સંકળાયેલાં જાતકો માટે સમય અનુકૂળ રહે. લાભના સ્ત્રોતમાં કમી આવી શકે છે. આકસ્મિક ધનહાનિ થવાની સંભાવના રહે. અન્યોને આપેલાં નાણા પરત ન આવે. મિત્રોનો વિરોધ સહન કરવો પડે. મન ચંચળ અને અનિર્ણયાત્મક બને. 

August 9, 2017

જોશીનું ટીપણું – 3


ક્યારેક કોઈને મંદિરે જવાનું કહીએને તો સામો પ્રશ્ન આવે કે કેમ? ઈશ્વર તો સર્વત્ર વ્યાપ્ત છે. હું તો ઘરે રહીને પણ ઈશ્વરને પૂજા અને પ્રાર્થના કરી શકું. મંદિરે જવાની શી જરૂર?

ખરી વાત. ઈશ્વર સર્વત્ર વ્યાપ્ત છે. પરંતુ દરેક સ્થળ પોતાની વિશિષ્ટ ઉર્જા અને આંદોલનો ધરાવે છે. ઘણીવાર તમે અનુભવ્યું હશે કે કોઈ મંદિરમાં પ્રવેશ કરતાં જ મન શાંત થઈ ગયુ હોય. મંદિરમાં દરરોજ થતી પૂજા-આરાધના, ધૂપ-દીપ, આરતી, મંત્રોચ્ચાર, ઘંટારવ વગેરે મંદિરની ઉર્જાને સકારાત્મક બનાવે છે. વળી મંદિરે આવતાં લોકો પણ ઘણુંખરું ઈશ્વર સ્મરણમાં મગ્ન રહેતાં હોવાથી તેમના વિચારોની ઉર્જા મંદિરની હવામાં ભળીને સકારાત્મક આંદોલનો પેદા કરે છે.

આથી વિરુદ્ધ ક્યારેક કોઈની ઘરે જતાં જ મન ઉદ્વેગ અનુભવવા લાગે. કારણકે તે ઘરના સદસ્યો વચ્ચે વારંવાર થતાં લડાઈ-ઝઘડાં, દલીલો, નકારાત્મક વિચારો હવામાં એક દુર્ગંધની માફક તરતાં હોય છે. આપણી છઠ્ઠી ઈન્દ્રીય તરત જ એ નકારાત્મક ઉર્જા અને આંદોલનોને પકડી લે છે અને ત્યાંથી ભાગી છૂટવાનું મન કરે છે.

દરેક સ્થળની વિશિષ્ટ ઉર્જા અને આંદોલનની નોંધ લો. જે સ્થળ મનને શાંતિ અને આનંદ આપે તેની ઉર્જાનો લાભ લો અને જે સ્થળે મન અકળામણ અનુભવે ત્યાંથી તુરંત બહાર નીકળી જાઓ. તમારા ઘરની ઉર્જાને સકારાત્મક બનાવી રાખવાં ઘરમાં તાજી હવા અને કુમળા તડકાને પ્રવેશવા દો. મંત્રોચ્ચાર કરો કે મધુર સંગીતના સૂર રેલાવો. ઘરમાંથી નકામો સંગ્રહી રાખેલો સામાન દૂર કરો. ધૂપ-દીપ, અગરબત્તીની સુગંધ વાતાવરણના આંદોલનોને સકારાત્મક બનાવે છે. ફૂલ-છોડ વાવો. ધ્યાન ધરો. હસો અને હસાવો. 

August 7, 2017

ખંડગ્રાસ ચંદ્રગ્રહણ (ઓગસ્ટ 2017) નું બાર રાશિઓ પરત્વે ફળ

આજે તા.7.8.2017, શ્રાવણ શુક્લ પૂર્ણિમા, સોમવારના રોજ મકર રાશિમાં ખંડગ્રાસ ચંદ્રગ્રહણ જવા થઈ રહ્યું છે. આ ગ્રહણ ભારત સહિત સંપૂર્ણ એશિયા ખંડ, યુરોપ ખંડ, આફ્રિકા ખંડ, રશિયાના દક્ષિણ પ્રદેશમાં, ઓસ્ટ્રેલિયા, પેસિફિક મહાસાગર, હિંદી મહાસાગર, એટલાંટિક મહાસાગર, એંટાર્કટિકામાં દેખાશે. ગ્રહણની અવધિ ભારતીય સમય અનુસાર રાત્રિના 22.52 કલાકથી શરૂ થઈ 24.49 કલાક સુધી રહેશે. 

આ ખંડગ્રાસ ચંદ્રગ્રહણ બાર રાશિઓ પરત્વે શુભ, અશુભ કે મિશ્ર પૈકી કેવું ફળ આપશે તે જોઈએ.

મેષ: શુભ ફળ – કારકિર્દી બાબતે નવી તકોની પ્રાપ્તિ થઈ શકે છે. નોકરી કે વ્યવસાયમાં પ્રગતિ થતી અનુભવી શકાય. સામાજીક પ્રતિષ્ઠાની પ્રાપ્તિ થાય.

વૃષભ: મિશ્ર ફળ – લાંબી યાત્રાઓ કરવાનું ટાળવું. પિતાના આરોગ્યની કાળજી લેવી. ઉચ્ચ અભ્યાસમાં અવરોધ આવવવાની શક્યતા રહે.

મિથુન: અશુભ ફળ – પોતાના આરોગ્યની કાળજી લેવી. અચાનક કોઈ નુક્સાન થવાની સંભાવના રહે. શ્વસુરપક્ષ સાથે ગેરસમજ ન થાય તેનું ધ્યાન રાખવું.  

કર્ક: મિશ્ર ફળ – લગ્નજીવનમાં મતભેદો થવાની શક્યતા રહે. જીવનસાથી સાથે ગેરસમજ ન થાય તેની કાળજી રાખવી. વ્યવસાયમાં સમજી વિચારીને નિર્ણયો લેવા.

સિંહ: શુભ ફળ – શત્રુઓ અને હરીફો પર વિજયની પ્રાપ્તિ થઈ શકે. કાર્યક્ષેત્રે સહકાર્યકરો મદદરૂપ બનતાં જણાય. પરિચારકોના સુખની પ્રાપ્તિ થાય.

કન્યા: મિશ્ર ફળ – અભ્યાસમાં એકાગ્રતા જાળવવી મુશ્કેલ બને. સંતાનોને લગતાં પ્રશ્નો ઉદ્ભવવાની સંભાવના રહે. પ્રણયજીવનમાં ગેરસમજ કે મતભેદો થવાની શક્યતા રહે.

તુલા: અશુભ ફળ – મન અશાંત અને વ્યગ્ર બને. માતાના આરોગ્યની કાળજી લેવી. ઘરથી દૂર જવાના સંજોગો ઉભા થાય. વાહન કાળજીથી ચલાવવું.

વૃશ્ચિક: શુભ ફળ – જોખમો ઉઠાવવાનું સાહસ કરી શકો. સંદેશાવ્યવહાર દ્વારા નવા સંબંધો કેળવી શકાય. ભાઈ-બહેનોનો સહકાર અને મદદ મળવાની શક્યતા રહે.

ધનુ: મિશ્ર ફળ કૌટુંબિક પ્રશ્નો ચિંતા કરાવી શકે છે. વાણી પર સંયમ રાખવો. દલીલો કરવાથી દૂર રહેવું. આર્થિક બાબતો અંગે કટોકટી પેદા થવાની સંભાવના રહે.

મકર: અશુભ ફળ – નકારાત્મક વિચારો આવવાની સંભાવના રહે. ચિંતા અને ઉપાધિ રહે. શરીરની કાળજી લેવી. દેહને કષ્ટ અને પીડા પહોંચવાની શક્યતા રહે.

કુંભ: અશુભ ફળ – નાણાકીય વ્યય થવાની સંભાવના રહે. આરામપ્રદ નિદ્રાનો અભાવ જણાય. પરદેશને લગતાં કાર્યોમાં નુક્સાન થવાની સંભાવના રહે.

મીન: શુભ ફળ – ધનલાભ થવાની શક્યતા રહે. મિત્રો મદદરૂપ બને. ઈચ્છઓની પૂર્તિ શક્ય બને. કાર્યક્ષેત્રે લાભ થવાની સંભાવના રહે. નવી ઓળખાણો થઈ શકે છે.

August 2, 2017

મંગળનું બાર ભાવમાં ફળ (સારાવલી)

પંડિત શ્રી કલ્યાણ વર્મા રચિત જ્યોતિષ ગ્રંથ સારાવલીના અધ્યાય 30ના શ્લોક 26 થી 37 મંગળનું બાર ભાવમાં ફળનું વર્ણન કરે છે. જેનો ભાવાર્થ નીચે મુજબ છે.

પ્રથમ ભાવ: જો મંગળ પ્રથમસ્થાન/લગ્નસ્થાનમાં હોય તો જાતક ક્રૂર, સાહસી, સ્તબ્ધ, અલ્પાયુષી, સ્વમાન અને શૌર્યથી યુક્ત, હિમતવાન, ઈજા પામેલ શરીર ધરાવતો, આકર્ષક દેખાવ ધરાવતો, ચંચળ સ્વભાવનો, ચપળ હોય છે.

દ્વિતીય ભાવ: જ્યારે મંગળ દ્વિતીયસ્થાનમાં હોય ત્યારે જાતક દરિદ્ર, નઠારું ભોજન કરનાર, કુરૂપ ચહેરો ધરાવનાર, અયોગ્ય લોકોની સંગત કરનાર, વિદ્યાવિહીન હોય છે.
 
તૃતીય ભાવ: જો મંગળ તૃતીયસ્થાનમાં હોય તો જાતક શૂરવીર, અજેય, ભાઈ-બહેનો રહિત, આનંદી, સદગુણો ધરાવનાર પ્રસિદ્ધ વ્યક્તિ હોય છે.

ચતુર્થ ભાવ: જ્યારે મંગળ ચતુર્થસ્થાનમાં રહેલો હોય ત્યારે જાતક સંબંધીઓના સુખથી રહિત હોય છે. સાધનસરંજામ અને વાહનવિહીન, અત્યંત દુ:ખી, અન્યોના ઘરે નિવાસ કરનારો અને સંતાપ પામેલો હોય છે.

પંચમ ભાવ: જો મંગળ પંચમભાવમાં સ્થિત હોય તો જાતક સુખ, સંપતિ અને પુત્રરહિત હોય છે. ચંચળ સ્વભાવનો, ચાડીચુગલી કરનાર, દુષ્ટતાને નોતરનાર, દુરાચારી, સંતાપ પામેલો, નીચ વ્યક્તિ હોય છે.

ષષ્ઠમ ભાવ: જો મંગળ છઠ્ઠા ભાવમાં રહેલો હોય તો જાતક અત્યંત કામી, પ્રબળ જઠરાગ્નિ ધરાવનાર, સ્વરૂપવાન, ઉંચો, બળવાન અને સંબંધીઓમાં અગ્રણી હોય છે.

સપ્તમ ભાવ: જો મંગળ સપ્તમ સ્થાનમાં સ્થિત હોય તો જાતક પત્નીને ગુમાવે છે. રોગોથી પીડા પામે છે અને દુષ્ટ માર્ગને અપનાવે છે. દુ:ખી, પાપી, ધનરહિત, સંતાપ પામેલો અને દુર્બળ શરીર ધરાવનાર હોય છે.

અષ્ટમ ભાવ: જ્યારે મંગળ આઠમાં ભાવમાં સ્થિત હોય ત્યારે જાતક રોગોથી પીડા પામે છે. અલ્પાયુષી, કુરુપ શરીર ધરાવનાર, નીચ કર્મ કરનાર, શોકથી સંતાપિત હોય છે.

નવમ ભાવ: કુંડળીમાં નવમભાવમાં મંગળ સ્થિત હોય ત્યારે જાતક પોતાના કાર્યોમાં અકુશળ હોય છે. ધર્મહીન, પ્રાણીઓની હિંસા કરનાર, સદગુણોરહિત, પાપી અને તેમ છતાં રાજા દ્વારા સન્માનીત હોય છે.

દસમ ભાવ: જો દસમભાવમાં મંગળ રહેલો હોય તો જાતક પોતાનાં કાર્યોમાં કુશળતા ધરાવનાર, શૂરવીર, અજેય, મહત્વની વ્યક્તિઓની સેવા કરનાર, પુત્રો અને સંપતિનું સુખ પામનાર, પ્રતાપી, બળવાન હોય છે.

એકાદશ ભાવ: જો મંગળ એકાદશભાવમાં સ્થિત હોય તો જાતક સદગુણી, સુખી, શૂરવીર, સંપતિ, ધાન્ય અને પુત્રોથી યુક્ત, દુ:ખરહિત હોય છે.

દ્વાદશ ભાવ: જો મંગળ બારમાં ભાવમાં રહેલો હોય તો જાતક રોગિષ્ઠ આંખ ધરાવનાર, નૈતિક મૂલ્યોમાં પતન પામનાર, પોતાની પત્નીની હત્યા કરનાર, ચાડીચુગલી કરનાર, રૌદ્ર તેમજ અપમાન અને બંધન ભોગવનારો હોય છે. 

July 28, 2017

જન્મભૂમિ પંચાગ વિ.સં. 2074 (નવેમ્બર 2017થી માર્ચ 2019 સુધી)

પ્રિય વાચકમિત્રો, 

જન્મભૂમિ પંચાગ વિક્રમ સંવત 2074 (નવેમ્બર 2017થી માર્ચ 2019 સુધી) માં આપ મારો 'છિદ્ર ગ્રહો' વિષય પરનો લેખ વાંચી શકશો. આશા રાખું છું જ્યોતિષમાં રસ ધરાવતાં મિત્રો માટે આ લેખ રસપ્રદ નિવડશે. આભાર


July 27, 2017

જોશીનું ટીપણું - 2


ઘણીવાર પ્રશ્ન થાય કે પ્રારબ્ધ ચડે કે પુરુષાર્થ? હકિકતમાં પ્રારબ્ધ અને પુરુષાર્થ બંને જોડિયાં બહેનો છે. હંમેશા આંગળી પકડીને સાથે-સાથે ચાલે છે. Inseparable! જેમ કે વરસાદ કેટલો આવશે અને ક્યારે આવશે એ ખેડૂતનું પ્રારબ્ધ છે. જ્યારે ખેતર ખેડવું અને વાવણી કરવી એ ખેડૂતનો પુરુષાર્થ છે. હવે વરસાદના અભાવે પાક નિષ્ફળ જઈ શકે છે અથવા વાવણીના અભાવે વરસાદનું પડવું નિરર્થક સાબિત થઈ શકે છે. અહીં જ્યોતિષની ભૂમિકા શું હોઈ શકે? શું જ્યોતિષ પ્રારબ્ધવાદી બનાવતું શાસ્ત્ર છે? ના, પરંતુ કઈ દિશામાં પુરુષાર્થ કરવો અને ક્યાં સમયે પુરુષાર્થ કરવો તેનો દિશા નિર્દેશ કરતું વિજ્ઞાન છે. 

ચાંદ્રમાસના નામ અને અધિક માસ

શું આપ જાણો છો કે આપણાં મહિનાઓના નામ કઈ રીતે પાડવામાં આવ્યાં છે? શુક્લ અને કૃષ્ણ પક્ષની 15–15 તિથિઓ મળીને કુલ 30 તિથિનો એક મહિનો બને છે. આ મહિનો ચાંદ્રમાસ તરીકે ઓળખાય છે. દરેક ચાંદ્રમાસને એક વિશિષ્ટ નામ આપવામાં આવ્યું છે. આ નામ જે-તે માસની પૂનમના દિવસે ચંદ્ર જે નક્ષત્રમાં હોય તે પરથી આપવામાં આવ્યું છે. ઉદાહરણ તરીકે જો પૂનમના દિવસે ચંદ્ર ચિત્રા નક્ષત્રમાં સ્થિત હોય તો તે મહિનો ચૈત્રકહેવાય છે. એ જ રીતે વિશાખાનક્ષત્રમાં હોય તો તે મહિનો વૈશાખતરીકે ઓળખાય છે વગેરે વગેરે.

સમય જતાં આ પદ્ધતિમાં સ્થૂળતા આવતાં ચાંદ્રમાસના નામો સૂર્ય રાશિ આધારિત રાખવામાં આવેલ છે. દરેક માસની અમાવસ્યા પૂર્ણ  થાય કે તરત જ બીજા માસની શુક્લ પ્રતિપ્રદા શરૂ થાય છે. તે સમયે સૂર્ય જે રાશિમાં થઈ હોય તેનાં આધારે તે મહિનાનું નામ નક્કી થાય છે. જેમ કે શુક્લ પ્રતિપ્રદાના આરંભ સમયે મીનરાશિમાં સૂર્ય હોય તો તે માસનું નામ ચૈત્રરહેશે (તે માસની પૂનમે ચંદ્ર મોટે ભાગે ચિત્રાનક્ષત્રમાં સ્થિત હોવાની સંભાવના રહે છે). તે જ રીતે જો સૂર્ય મેષરાશિમાં સ્થિત હોય તો તે માસનું નામ વૈશાખરહેશે (ચંદ્ર પૂનમના વિશાખાનક્ષત્રમાં હોવાની સંભાવના).

કોષ્ટક

શુક્લ પ્રતિપદારંભે  સૂર્યરાશિ
ચાંદ્રમાસ નામ
પૂનમના મોટેભાગે ચંદ્રનું નક્ષત્ર
લગભગ ક્યારે?
તુલા
કાર્તિક
કૃતિકા
ઓક્ટોબર/નવેમ્બર
વૃશ્ચિક
માર્ગશીર્ષ
મૃગશીર્ષ
નવેમ્બર/ડિસેમ્બર
ધનુ
પૌષ
પુષ્ય
ડિસેમ્બર/જાન્યુઆરી
મકર
માઘ
મઘા
જાન્યુઆરી/ફેબ્રુઆરી
કુંભ
ફાલ્ગુન
પૂર્વા/ઉત્તરા ફાલ્ગુની
ફેબ્રુઆરી/માર્ચ
મીન
ચૈત્ર
ચિત્રા
માર્ચ/એપ્રિલ
મેષ
વૈશાખ
વિશાખા
એપ્રિલ/મે
વૃષભ
જ્યેષ્ઠ
જ્યેષ્ઠા
મે/જૂન
મિથુન
આષાઢ
પૂર્વા/ઉત્તરાષાઢા
જૂન/જુલાઈ
કર્ક
શ્રાવણ
શ્રવણ
જુલાઈ/ઓગસ્ટ
સિંહ
ભાદ્રપદ
પૂર્વા/ઉત્તરા ભાદ્રપદા
ઓગસ્ટ/સપ્ટેમ્બર
કન્યા
આશ્વિન
અશ્વિની
સપ્ટેમ્બર/ઓક્ટોબર

બાર ચાંદ્રમાસ મળીને એક ચાંદ્રવર્ષ બને છે. એક ચાંદ્રવર્ષની લંબાઈ આશરે 354 દિવસ, 8 કલાક, 48 મિનિટ, 34.379712 સેકંડ છે. આકાશમાં બાર રાશિઓમાંથી પસાર થતાં સૂર્યને આશરે 365 દિવસ, 06 કલાક, 09 મિનિટ, 09.540288 સેકંડ લાગે છે. સૂર્યના વર્ષને સૌરવર્ષ કહેવાય છે. સૌરવર્ષ કરતાં ચાંદ્રવર્ષ નાનું હોવાથી વચ્ચે વચ્ચે અધિક માસ ઉમેરવામાં આવે છે. જ્યારે સૂર્ય એક જ રાશિમાં બે ચાંદ્રમાસની શુક્લ પ્રતિપદારંભે રહ્યો હોય ત્યારે અધિક માસ ઉમેરાય છે. ઉદાહરણ તરીકે આવતાં વર્ષે 2018માં મે/જૂન દરમિયાન જ્યેષ્ઠ માસની શુક્લ પ્રતિપદાના આરંભે સૂર્ય વૃષભ રાશિમાં સ્થિત હશે. ત્યારબાદ આવતાં બીજા ચાંદ્રમાસની શુક્લ પ્રતિપદા આરંભે પણ સૂર્ય વૃષભ રાશિમાં જ હશે. આથી 2018નું વર્ષ બે જ્યેષ્ઠ માસ ધરાવે છે. પહેલાં માસને અધિકમાસ કહેવાય છે. એટલે કે અધિક જ્યેષ્ઠ કહેવાશે. ત્યારપછીના માસને નિજકહેવાય છે. આમ પછીનો માસ નિજ જ્યેષ્ઠ કહેવાશે. લગભગ દર ત્રણ વર્ષે આ રીતે અધિક માસ ઉમેરાય છે. અધિક માસ સામાન્ય રીતે ફાલ્ગુનથી આશ્વિન સુધીના 8 માસ દરમિયાન આવે છે.